quinta-feira, 17 de abril de 2008

Pandeiro quadrado antigo


Un destes díes ua rapaza de Dúes Eigreijas (Céu) dixo-me que teníe un pandeiro dels antigos dels que ousaban ne l Grupo de alhá.

Inda ten un bon sonido nua de las pieles que cuntinua bien sticada.

Na realidade ye un pandeiro que fui feito por Alfredo Ventura (nun fago eideia quando) cun la mesma calatriz de un que ten míe mai i outro que ten míe tíe. Estes son ls tré unicos pandeiros que el fizo i que you conheço.

La piel ousada fui apurbeitada de un bombo roto como podeis ber ne l retrato que bos amostro a seguir, adonde se notan bien las drobas del aro.





Ua de las pieles yá fui rumpida, nota-se bien l rasgo que fui colado cun algua spécie de cola nun sei se de la madeira, se daquielha de contacto (que se pon na borraixa). An riba de la cola puniru-le ua fita dessas castanhas bien lhargas para mantener la piel segura i an cuntacto cun l pegamento. Bin ou mal, l cierto ie que continuou a tocar.



Ls anfeites, apost que fuorun feitos pulas Armanas Dreitas. Só l anfeitorun cun filos i sien bolras, que cumo bedes quedou bonito i simples. Ls problemas deste pandeiro, parece-me a mi que resultorun dels anfeites ou seia: para sigurar ls filos, hai que le betar uas brochas ou arestas, que neste causo fuorun algo grandes i mal spetadas, salindo alguas bezes para fuora i rumpendo assi la piel.


La piel apost que fui demolhada para quedar mais bien andonada a l aro, i apuis pregada. Cumo dixe antes, inda stá bien sticada pal tiempo que ha-de tener este strumento.






Todos ls retratos son de Paulo Meirinhos


Safou-se este pandeiro de star nalgun museu nun se sabe donde... Ye l único pandeiro que nun seia de miniatura cumo ls que tenen míe mai i míe tíe que you cunheço pur estas tierras. Ls outros han-de star a apanhar puolo nalgua reserba de Museus pur esse mundo. L de Miranda tamien nun ten niun dels de miu abó...

5 comentários:

céu disse...

Apesar de estar bielho, tengo muita proua cun este pandeiro :)

Tiégui disse...

Stais todos bien purreiros culas buôssas pandeiretas héhé

Ende pudeis ber "Camin de Cantares" onde stan alha dues pandereiteiras (sta al bidio an barias partes) :
http://www.youtube.com/watch?v=WI9ktgmFNdM&feature=related

Pensei que bos puderie antressar.

Palmeiros disse...

Biba Tiégui!

Dius te pague este recado.
Na berdade yá coincia estes programas. L apresentador fai l fabor de ser miu amigo i yá tocou cun un dels mius pandeiros.
L pandeiro ye un stremento musical ousado an toda la peninsula mas na nuossa zona ye que el ten mais formatos.

Tiégui disse...

Buonas !
hahaha ! Mui bien ! Nun sabie que bos coineciedes... anton fai-l benir un die par'ende que fai falta fazer un "Camin de cantares" pa las nuossas tierras :p

fabio disse...

moro no brasil, cidade do rio de janeiro, meu nome e fabio, achei muito legal essa atitude sua gostaria de saber mais coisas sobre o pandeiro ,apesar de ter aprendido muito com seu blog obrigado.