L pandeiro pneumático

Pandeiro pneumático, nun ye mais que un pandeiro cumo ls outros só que le fui puosta ua cámara d'aire pur riba de l aro i an baixo de la piel, ou seia, antriçada antre estes dous eilementos.

L sigundo pandeiro que you fiç lhebou este sistema, para spurmentar a ber se resultaba bien la eideia. Fui l pandeiro númaro dous(2).

Al fin de cuontas, un sistema pneumático ten que ber cun algo que seia uoco i apresente câmaras d'aire an drento cun aire a presson ou nó.

Apuis de amostrar le pandeiros que iba fazendo, chegorun-me nuobas de la Austria i de l Canadá que habíe un rapaç na Almanha a fazer strumentos cun un sistema eigual a este.

La página del Almán ye esta i apresenta alhá ls strumentos que fai mui bien mas que nun son pandeiros: http://www.davidromandrums.com/

Hai muitas cousas adonde se amprega esse sistema pneumático cun esse mesmo nome cumo seia:

Chabes pneumáticas de zapertar las ruodras dels carros (mui ousadas nas oufrecinas);
Suspensones pneumáticas (ousadas ne ls carros topos de gama i ne ls camiones);

Uossos pneumáticos, son ls que tenen algns paixaros i réptils para que seian mais lebes (apresentan ua ou mais cabidades, de belume bariábel, rebestidas de mucosa i cunteniendo aire).
Nada melhor do que dar-le l nome de pneumático al pandeiro.

Ne ls pandeiros, este sistema ten muita outelidade an díes friu i cun muita oumidade. L que passa nesse díes ye que las pieles naturals afrouxan muito, quedan meio angurriadas, i l sonido resinte-se muito. Anton, dámos-le uas bombadas cun ua bomba de las bicicletas, i la cámara incha a toda la buolta retesando la piel cumo se fuossa un díe seco de brano, cun la bentaije de podermos meter i sacar l'aire que mos dir la gana.

Nestes pandeiros hai que tener an atençon dúes ou trés cousas:

Ls anglos nun puoden quedar mui agudos, teneis que ls limar ou lixar mui bien para que las arestas nun fágan antupir la cámara d'aire nesse puonto;

Ls pandeiros que quérgamos eiquipar cun este sistems, tenen que tener ls anglos mui abiertos, nada de anglos retos cumo ls quadrados ou cerrados cumo ls trianglos, purque nun deixan passar l'aire an drento de la cámara.

Scusado será dezir, que para cuser estes pandeiros hai que tener trabalhos redobrados i muita atençon para nun picar cun la agulha la burraixa, senó... "adius biola" scapa-se l'aire i nun sirbe de nada este aparato.

Todos ls retratos fuorun feitos por Paulo Meirinhos

Buonas tocadelas!