Retrato stórico cun 60 anhos

Retrato cedido pul Museu de la Tierra de Miranda

Este ye un de ls retratos mais anteresantes que you conheço de i que repersenta mui bien la tradiçon de cantar i tocar de las mulhieres de la Tierra de Miranda.

Bamos-mos a situar: Angola 1948

An 1948 l Grupo de Dues Eigreijas fiç ua digreson a las Clónias, fuorun de barco i stubirun pur alhá trés meses, fazirun muitas apresentaçones cun muito sucesso. Fuorun ls pauliteiros i danças mistas ourientados pul Padre Mourinho. Esta biaije fui hai 60 anhos.

L miu anteresse special pur este retrato ten a ber cun ls strumentos que eiqui aparécen, senó bede: pandeiros de quatro feitios, pandereta i ua caixica de madeira que ya bos cuonto...

Isabel Pia - Lhieba ua pandeireta ou çarandielha de tamanho pequeinho anfeitada cum bolras i filos de lhana.

Maria Gregório (Maria Leandra) - Aparece cun un pandeiro heisagonal feito por Alfredo Ventura cumo todos ls outros, tamien anfeitado cun bolras i filos. Ls pandeiros tenien siempre ua spécie de alça para seren culgados de l ombro. L Senhor Galandun, bela-se cun l pandeiro assi culgado.

Adelaide Lopes - Toca un pandeiro quadrado algo maior do que l de la outra cantadeira Isaura.

Laura Fernandes (de las armanas Dreitas) - Pandeiro losango, que teníe drento uns chocalhicos presos por uns filos sigundo me dixo eilha. Dixo-me tamien que miu abó lo fiç cun la piel de un bitelo i que daba mui bon sonido.

Isaura Ferreira - Pandero quarado, mais a dar pa l retanglo. Cumo ya bos dixe, miu abó ousaba retalhor de ripas que le iban sobrando de la carpintaria i fazíe ls pandeiros cun l tamanho que melhor se le arranjaba nesse díe.

Adelina Fernandes (de las arnanas Dreitas) - L strumento que Adelina ten nas manos, era ua caixica de madeira de spessura fina cun uns buraquitos, drento, Afredo Ventura, metiu-le las cuordas dun reloijo de parede. Quando se tocaba la caixica essa, la cuorda anroscada de l reloijo rugíe drento i daba bon sonido, isto fui l que me cuntorun Ana Maria Fernandes e Laura Fernandes (las armanas Dreitas que toda la bida fazirun parte del Grupo de Dúes Eigreijas).

Isabel Fidalgo - Ten nas manos un pandeiro trianglar sien bolras nien anfeites. Dizen que eilha cantaba mui, mui bien.

Ya precurei pur mais fazedores de pandeiros pur estas zonas, la unica persona de que oubi falar, fui de ua Tíe Rita de l Campo (Campo de Víboras) que los fazíe an formato quadrado, hai puri 50 anhos. A ber se alguien cunsigue saber algo deilha...

Ls pandeiros mirandeses tenen estas formas i isso nel miu antender debe-se a Alfredo Ventura que ls fazíe, i siempre teníe la gana de fazer melhor i difrente, era mui eisigente na maneira de cantar i tocar.

Tocaba la caixa no Grupo i sabíe tocar bien la trabessa (flauta transversal). A mi inda se me lhembra de la ber alhá por casa. Molhaba-la ne l bino purque diç que daba melhor sonido.

An casa del, ne ls serones cantaba-se muito i bien i siempre a bozes.

Ls anfeites de ls pandeiros, eran quaije siempre feitos pulas Dreitas. An prósimas amboras, falo-bos de la maneira cumo ls fázen.

Las anformaçones que bos dou equi, fuorun-me transmitidas pur míe mai, Eliodora Ventura, i pulas armanas Laura Fernandes i Ana Maria Fernandes.

Equi bemos Alfredo Ventura pur trás de las cantadeiras na biaije a Angola.